أنا مُعْتَرفة تمامًا إني مش ضليعة ف اللغة العربية الفُصحى و لحد ما ده يتغير، هكتب بالعربي المصري العامي. الاعتراف بالحق فضيلة...
بسم الله!
أظن كل معارفي (أو بمعنى أصح، كل اللي عندي على شبكات التواصل الاجتماعي) عارفين إني نازية نحوية وإملائية. مش هيهمني قد إيه المَثَل اللي إنتَ كاتبه جميل وعميق وهعلق على الأخطاء الإملائية، عادي جدًا. أي حاجة مكتوبة غلط بتبقى مستفزة وشبه مؤلمة كمان للي زيي.
فيه ناس اتعودت وبيفوتوا وناس بتحاول تستفيد من خبراتي اللغوية وناس تالتة، أعوذ بالله، لسة شايفين ده نوع من قلة الأدب أو الغلاسة أو التنطيط. ومن الجدير بالذكر، إن النوع التالت ده بَدَل ما يعترف بأخطائه ويصلحها بمنتهى البساطة، بيحب يطلعني أنا اللي ببالغ وبدقق ف حاجات صغيرة.
أعزائي الناس اللي من الفئة التالتة، ارجعوا ابتدائي. أه والله! لما تبقوا بتكتبوا "تعزيب" و"مدايق" و"كنتى" و"إنشاء الله" في حين إن إنتم ف العشرينات أو حتى الخمسينات، يبقى مكانكم ف ابتدائي! وياريت محدش بس يقول لي "أصل ديه العامية يعني ما إحنا ممكن نكتبها زي ما إحنا عايزين!!"، لإن العامية أصلها الفصحى ومهما غيرنا وبهدلنا ف اللغة الجميلة ديه هتفضل العامية متفرعة من الفصحى رغم أنف الجاهلين. أما بالنسبة لجرائم اللغات الأخرى، فهتكلم عنهم ف مقال تاني.
 |
| المصرد: السومرية |
أحب أوضح حاجة بس ف الآخر، أنا كسماء مش منزهة عن الخطأ وكذا مرة بعمل أخطاء سواء بسبب تسرع أو عدم معرفة، بس على الأقل لما حد بيصلحلي حاجة، بحاول أستفيد من المعلومة ومش باخدها على نفسي وأكَبَّر الموضوع بشكل أهبل وغير هادف.
لو عجبك المقال ده اعمل +1 وشاركه مع أصحابك! اعملي فولو عشان تتابع مقالاتي كمان. اضغط هنا عشان يجيلك إيميل أول بأول!
No comments:
Post a Comment